ସମ୍ମାନ ନ ମିଳିବାରୁ ଅସନ୍ତୁଷ୍ଟ ହେଲେ ବିଧାୟକ ଓ ମନ୍ତ୍ରୀ, ମୁଖ୍ୟମନ୍ତ୍ରୀଙ୍କୁ କରିବାକୁ ପଡ଼ିଲା ହସ୍ତକ୍ଷେପ

ସମ୍ମାନ ନ ମିଳିବାରୁ ଅସନ୍ତୁଷ୍ଟ ହେଲେ ବିଧାୟକ ଓ ମନ୍ତ୍ରୀ, ମୁଖ୍ୟମନ୍ତ୍ରୀଙ୍କୁ କରିବାକୁ ପଡ଼ିଲା ହସ୍ତକ୍ଷେପ
**ସମ୍ବଲପୁର/ ରେଙ୍ଗାଳି:** ଭାରତର ଇସ୍ପାତ ନିର୍ମାତା ଜେଏସ୍‌ଡବ୍ଲୁ ଏବଂ ଜାପାନର ଜେଏଫ୍.ଇ ଷ୍ଟିଲ୍ କର୍ପୋରେସନ ମଧ୍ୟରେ ଅନୁଷ୍ଠିତ ବ୍ୟବସାୟିକ ଚୁକ୍ତିନାମା ଘୋଷଣା କାର୍ଯ୍ୟକ୍ରମ ସମ୍ବଲପୁରରେ ଏକ ବଡ଼ ରାଜନୈତିକ ବିବାଦର କାରଣ ପାଲଟିଛି। କାର୍ଯ୍ୟକ୍ରମ ସ୍ଥଳରେ ଅତିଥିମାନଙ୍କୁ ଉପଯୁକ୍ତ ସମ୍ମାନ ପ୍ରଦାନ କରାଯାଇ ନଥିବା ନେଇ ଦୁଇ ପ୍ରମୁଖ ବିଧାୟକ ପ୍ରତିବାଦ କରିବାରୁ ପରିସ୍ଥିତି ସରଗରମ ହୋଇଉଠିଥିଲା।
**କଣ ଥିଲା ବିବାଦ?**
ସୂଚନା ଅନୁଯାୟୀ, କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ, କେନ୍ଦ୍ରମନ୍ତ୍ରୀ, ବରିଷ୍ଠ ମନ୍ତ୍ରୀ ଓ ବିଧାୟକମାନେ ଉପସ୍ଥିତ ଥିଲେ। ତେବେ ମଞ୍ଚରେ ଅତିଥିମାନଙ୍କ ବସିବା ବ୍ୟବସ୍ଥା ଏବଂ ପ୍ରୋଟୋକଲକୁ ନେଇ ସମ୍ବଲପୁର ବିଧାୟକ ଜୟନାରାୟଣ ମିଶ୍ର ଓ ଝାରସୁଗୁଡ଼ା ବିଧାୟକ ଟଙ୍କଧର ତ୍ରିପାଠୀ ଗଭୀର ଅସନ୍ତୋଷ ପ୍ରକାଶ କରିଥିଲେ। ମଞ୍ଚରୁ ଓହ୍ଲାଇବା ପରେ ଉଭୟ ବିଧାୟକ ସର୍ବସମ୍ମୁଖରେ ନିଜର କ୍ରୋଧ ବ୍ୟକ୍ତ କରିଥିଲେ। କେବଳ ବିଧାୟକ ନୁହଁନ୍ତି, ରାଜସ୍ବ ମନ୍ତ୍ରୀ ସୁରେଶ ପୂଜାରୀ ଏବଂ ପଞ୍ଚାୟତିରାଜ ମନ୍ତ୍ରୀ ରବି ନାଏକଙ୍କୁ ମଧ୍ୟ ଏହି କାର୍ଯ୍ୟକ୍ରମରେ ଅବହେଳା କରାଯାଇଥିବା ନେଇ ଚର୍ଚ୍ଚା ଜୋର ଧରିଛି। ଅସନ୍ତୋଷ ବ୍ୟକ୍ତ କରି ରାଜସ୍ବ ମନ୍ତ୍ରୀ କାର୍ଯ୍ୟକ୍ରମ ଶେଷ ହେବା ପୂର୍ବରୁ ହିଁ ମଞ୍ଚରୁ ବାହାରି ଆସିଥିଲେ।
**ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ**
ପରିସ୍ଥିତିକୁ ନିୟନ୍ତ୍ରଣ କରିବା ପାଇଁ ମୁଖ୍ୟମନ୍ତ୍ରୀଙ୍କୁ ବାରମ୍ବାର ହସ୍ତକ୍ଷେପ କରିବାକୁ ପଡ଼ିଥିଲା। ଉତ୍ତେଜିତ ବିଧାୟକ ଜୟନାରାୟଣ ମିଶ୍ର ଓ ଟଙ୍କଧର ତ୍ରିପାଠୀଙ୍କୁ ବୁଝାଇବା ପାଇଁ ମୁଖ୍ୟମନ୍ତ୍ରୀ ଦୁଇଥର ଉଦ୍ୟମ କରିଥିଲେ। ଜେଏସ୍‌ଡବ୍ଲୁର ଅଧିକାରୀମାନେ ମଧ୍ୟ ସ୍ଥିତିକୁ ସମ୍ଭାଳିବାକୁ ଚେଷ୍ଟା କରି ବିଫଳ ହୋଇଥିଲେ। ଶେଷରେ ମୁଖ୍ୟମନ୍ତ୍ରୀ ଉଭୟଙ୍କୁ ବୁଝାସୁଝା କରି ଶାନ୍ତ କରାଇଥିଲେ।
**ରେଙ୍ଗାଲି ବିଧାୟକଙ୍କ ଅନୁପସ୍ଥିତି**
ଏହି କାର୍ଯ୍ୟକ୍ରମରେ ରେଙ୍ଗାଲି ବିଧାୟକ ସୁଦର୍ଶନ ହରିପାଲଙ୍କ ଅନୁପସ୍ଥିତି ମଧ୍ୟ ସହରରେ ଆଲୋଚନାର ବିଷୟ ପାଲଟିଥିଲା। ତେବେ ଏ ସମ୍ପର୍କରେ ପ୍ରତିକ୍ରିୟା ଦେଇ ବିଧାୟକ କହିଛନ୍ତି ଯେ, ସ୍ୱାସ୍ଥ୍ୟଗତ କାରଣରୁ ସେ ଭୁବନେଶ୍ଵରରେ ଥିବାରୁ କାର୍ଯ୍ୟକ୍ରମରେ ଯୋଗ ଦେଇପାରି ନଥିଲେ।